早前本港同新加坡研究推出嘅旅遊氣泡已有初步協議,兩地將採取專屬航班來往,並喺今個月22號起航,整個旅程中旅客須接受3次檢測。而容許身處廣東省、澳門嘅香港居民回港嘅「回港易」計劃,將會喺下星期三(18號)開始預約,符合特定條件下可豁免回港後14日檢疫。

商務及經濟發展局局長邱騰華表示,兩地往來旅客須有檢測陰性結果及乘搭特定航班,航空旅遊氣泡專屬航班會由國泰航空同新加坡航空營運。本港市民喺前往新加坡前72小時內,要接受一次檢測並獲陰性結果。而第二次檢測就會喺到達新加坡72小時後喺當地做一次檢測,收費約200新加坡元(約1152港幣)。本港旅客回港後亦要再檢測一次。旅遊氣泡將因應兩地疫情情況作出調整增加或減少航班,由11月22號開始嘅頭15日,每日將會有一班機抵港,其後將增至兩班,每一班機最多接載200人。

至於「回港易」計劃將會喺11月23號(星期一)起推出,容許身處廣東省或澳門嘅香港居民喺符合條件下回港,並豁免14日檢疫。條件包括:必須為香港居民;回港前14日內無到過香港、澳門、廣東以外嘅地區;取得粵港兩地認可機構嘅病毒核酸陰性檢測;檢測證明需要喺回港當日或之前發出;需要喺網上申請取得名額。而有關「回港易」網頁會由11月18號起開始預約,每周三至五預約下周7日任何一日出行。

圖:香港國際機場