今日係雙11,唔少網購平台都大搞活動,吸引人買買買。而由香港旅遊發展局主辦嘅「香港美酒佳餚巡禮」都係今日舉行,不過由於新冠疫情關係,今年嘅香港美酒佳餚巡禮就會以「線上+線下」形式舉行。只要登入活動網站,大家足不出戶就可以買到美酒佳餚喇~

由今日(11號)開始至下個月15號,市民登入活動網站就可以瀏覽飲、食、玩三大主題內容。網站雲集超過100個酒商提供嘅美酒,其中更有唔少酒商提供優惠,仲有埋全港逾500間餐廳優惠。網站每個星期亦會推介15個精選優惠,方便大家選購。活動仲設有各種網上大師班,教大家授烹調美食、品嘗佳釀等。

嫌網上巡禮唔夠喉?你仲可以喺城中人氣餐廳參與主題活動,品嚐米芝蓮星級美食或道地小吃,一樣可以享受餐飲禮遇,線上線下都有得歎!

詳情請瀏覽:https://winedinefestival.discoverhongkong.com/tc/

圖:旅發局