大家聽過蹼泳未?知唔知係咩?其實蹼泳係一種要穿上腳蹼及蛙鞋嘅水中運動,泳姿就好似暢泳,由於速度快,被喻為「水中的一級方程式」。蹼泳教練藍汶軒表示:「蹼泳速度前所未有,自己教過好多成年人,佢哋都覺得游水好困難,但改玩蹼泳之後,速度快咗好多,好有滿足感,亦從中搵到樂趣。」

初玩蹼泳 腳腕好痛

藍汶軒自細就係游泳健將,主要游蝶泳及背泳,2011朋友介紹下,貪得意試玩蹼泳「當時覺得著住腳蹼去游,有啲似蝶式,於是我用蝶式方法去游點知腳腕好痛,發現原來蹼泳蝶泳係唔不同於是喺好奇心驅使下,就開始深入研究蹼泳。」後來佢發現,蝶式係靠腳發力,但著住腳蹼,由於面積大,假如肌肉力量唔夠,對腳腕關節負荷好大,所以應該係靠腰部嚟發力。

藍汶軒喺115月,第一次參與蹼泳比賽,奪得第三名。後來佢加入港隊,更到中國煙臺參與蹼泳世界盃分站賽,為佢帶嚟好震撼嘅體驗:同組冠軍那位喺比賽中破咗世界紀錄,發覺大家水平真係相差好遠。」之後藍汶軒喺亞錦賽(2012年越南、2015年台灣)都進入頭八名,2012年參加全國春季賽,更攞到50米雙蹼金牌及100米雙蹼銅牌。

善用工具 作身體延伸

其實蹼泳同游泳表面睇好相似,但係兩種唔同嘅運動,游泳係由泳總管理,而蹼泳就屬於潛總。兩者最大嘅分別,係游水動作好多係喺水面進行,而蹼泳就喺水底多啲,因為喺水底可以善用水流,所以兩項運動本質上並唔一樣。

藍汶軒鍾意蹼泳速度感好快,穿上腳蹼後,一秒可游到3米。「有啲運動員游水好快,但著咗腳蹼之後,唔會游快好多,但有啲人游水唔係好快,但著住腳蹼就可以快好多。」藍汶軒仲話,唔同國家出產嘅器材都有細微分別,全部都係科學,例如流體力學等,只要善用工具,作為身體延伸,就可以快好多。

藍汶軒後來修讀中文大學的體育及運動科學教育碩士,並於退役後便全力推廣蹼泳。對於藍汶軒嚟講,佢現時最大嘅目標,就係希望喺學校層面推動呢項運動:「蹼泳喺香港發展無游泳咁普及,亦唔係精英項目,資源比較少。」不過佢慶幸,近十年多咗好多年輕運動員參與,近幾年發展得幾好。

圖片來源:受訪者提供


藍汶軒自細就係游泳健將,2011年喺好奇心驅使下,轉玩蹼泳。


蹼泳又稱為水中一級方程式,穿上腳蹼之後,一秒可以游到3米。


藍汶軒第一次參與世界盃分站賽,同組對手就打破世界紀錄,令佢好震撼。


藍汶軒喺2012年參加全國春季賽,更攞到50米雙蹼金牌及100米雙蹼銅牌。