有特殊教育需要(SEN)嘅學生往往需要更多耐性、愛心去教,廣西有位本來已經退咗休嘅老師梁志雄,因為心繫三名SEN學生,申請返聘,重回學校,只為咗繼續陪伴三個學生,等佢哋唔好失學。

呢個位於廣西比較偏僻嘅深山教學點——逢通教學點,之前仲係一個擁有200多個學生嘅小學,自從2017年因教育資源整合優化之後,教學點嘅師生大多數已經遷入其他小學,剩返阿旺、阿興同阿山呢三個有特殊教育需要嘅學生。梁志雄喺逢通教學點已經教咗15年,退休之後選擇繼續留低陪住呢3名學生:「他們就像我的孩子一樣,我愛他們,我捨不得他們。」梁志雄表示,三個小朋友都有唔同程度嘅語言障礙、認知障礙、智力比較低,生活自理能力亦有限。佢平時除咗教佢哋識字、數學同拼音之外,仲教佢哋打籃球、打乒乓球、做家務,甚至係洗手同去廁所。但每日教嘅嘢,佢哋好快就會忘記,需要反反復復咁教,不過比起以前佢哋乜嘢都唔識嘅情況,宜家已經好好多。

梁志雄嘅爸爸已經90歲,眼睛接近失明,為咗同時照顧爸爸同三個小朋友,梁志雄索性將爸爸接嚟身邊。阿山平時會同梁志雄一齊住喺教學點,由梁志雄照顧佢嘅生活起居,而阿旺、阿興就由爺爺每日接送。梁志雄同3個學生嘅關係情同父子,佢睇住幾個小朋友日益進步,自理能力越來越好感到安慰。但佢依然遺憾唔可以給予佢哋更多,只希望佢哋可以健康成長,以及呼籲社會各界可以俾SEN學生更多關注、關愛。

圖:中新網