醫護人員為醫治病人盡心盡力,河南有位叫許麗敏嘅護士為咗避免病人咬斷引流管,影響治療效果,不顧自己被病人咬傷,最後導致右手手腕有一個深刻嘅咬痕,觸目驚心。但許麗敏就無怪病人,只係簡單包扎之後就繼續工作。

據內地傳媒報道,呢個咬傷許麗敏嘅病人因車禍入院,之後情緒好唔穩定,凌晨2點突然變得好暴躁,想用嘴咬甩自己手臂上嘅做緊負壓封閉引流嘅引流管。許麗敏發現之後即刻制止佢,點知病人突然咬住許麗敏嘅右手手腕,許麗敏顧唔得咁多,只係用左手㩒住引流管。病人跟住繼續咬住許麗敏嘅手腕,一路掙扎又唔肯接受治療,最後有醫護人員幫病人打咗鎮定劑先令佢冷靜落嚟,放開許麗敏。但當時許麗敏隻手腕已經被咬咗2分鐘,傷口穿咗個窿,又黑又紫,仲出血點。

不過許麗敏只係簡單清洗、包扎傷口就繼續工作,連護士長叫佢早啲返去休息都唔肯。許麗敏話佢係該病人嘅主管護士,比較了解佢嘅病情,於是堅持值班。病人嘅妻子之後向許麗敏道歉,感激佢被咬傷後依然堅守崗位,許麗敏就表示,雖然覺得委屈,但當時情況危急,況且病人意識唔清醒,心入面並唔怪佢,只係忙住救人都顧唔上疼痛。之後許麗敏嘅事跡被廣泛報道,佢因此獲得「天天正能量特別獎」,不過佢話自己只係做咗所有醫護人員都會做嘅小事,以後亦會繼續為病人提供優質服務。

圖:網上圖片