雖然香港係石屎森林，一樣可感受大自然之美，而Andrew嘅工作就係為我哋留下香港最自然一面。Andrew係龍虎山環境教育中心助理項目主任，負責拍攝龍虎山一帶生態。

Andrew與大自然結緣，源於多年前一次印尼之旅：「我其實本身有潛水，有一次跟海洋公園保育基金，去印尼做一個保育當地熱帶魚嘅計劃之後，發現當地生態好靚，而當地人生活好樸素，由細到大都有一個保護大自然嘅意識，其後我就喜歡跟大自然相處，多咗睇周邊環境。」Andrew仲表示，佢讀大學時已有拍片經驗，後來看到Netflix一套紀錄片，覺得佢哋拍得好靚，就想到不如自己試試拍一些大自然嘅影片，而剛好那時龍虎山環境教育中心招聘實習生，佢嘗試報名。

Andrew最難忘係第一次去夜行嘅時候，就喺碧山徑行到香港大學嗰一邊，見到一條金腳帶：「金腳帶係一條罕見嘅毒蛇，而我們發現嘅位置，其實係我做學生時經常經過嘅位置，我發現原來一些我經常去嘅地方，再行多二十或三十級樓梯，原來已經有咁有趣嘅生物。」

要拍攝動物生態，並不是一件易事，Andrew亦要慢慢累積經驗：「一開始拍攝嘅時候，見到生物會衝過去拍攝，反而會影響那生物對環境嘅反應，甚至會嚇走佢哋，慢慢就發現，其實只要企喺度拍攝或定下來，等該動物會適應你在環境之中，然後佢就會做回平時做嘅事情，這時再拍攝才是較佳嘅方法。」

佢亦建議香港人，郊遊時也可放慢腳步：「香港人生活節奏比較快，我覺得大家行山時可以嘗試放慢節奏，除咗睇風景之外，可以多啲欣賞身邊植物，甚至欄杆或路邊嘅事物，會發現有很多動物棲息於此。另外，很多香港人習慣行山會一路行到觀景台或山頂才休息，但會錯過了沿途風景或動物，所以大家放慢節奏地行，就會是最好嘅觀賞方法。」

大家下次行山郊遊時，也不妨放慢腳步，感受香港之美吧。