日本京都一間叫「餃子的王將出町店」嘅鋪頭,因為免費俾學生食到飽、提供以洗碗代替餐費而聞名,由開張到宜家幫助超過三萬人。不過呢間鋪頭已經喺上月底結業,唔少老主顧、曾受惠嘅客人非常不捨,不惜千里迢迢趕喺結業前嚟食最後一餐。

根據日媒報導,「餃子的王將出町店」喺40年前為咗幫助手頭緊、無錢食飯嘅客人,而提供「幫忙洗碗代替餐費」嘅服務,直到兩年前先因為衛生問題而取消。不過店家依然繼續做善事,貼出告示指「手頭緊從昨天開始就沒吃過東西的學生」,就可以免費喺店內食到飽為止。此舉令30000幾個學生受惠,唔少人亦喺店家嘅記事本度留言感謝。

店長井上定博話,只要對有困難嘅人伸出援手,咁對方亦一定會將呢種精神傳下去,久而久之,人人互助嘅精神就會傳遞落去,所以願意長年默默付出。而因為加盟契約即將到期嘅關係,井上定博決定喺上個月底休業,好多過往受到店家恩惠嘅客人,聽到消息之後都紛紛趕嚟鋪頭食最後一餐,有客人更專程喺神奈川搭新幹線而嚟。大家除咗為咗一飽口福之外,亦為感謝曾經接受過嘅恩情。

圖:網上圖片