新冠肺炎打擊全球經濟,對於依賴旅遊業為主要經濟來源嘅印尼峇里島嚟講,打擊尤其大。唔少居民因此失業,當地一間旅遊學院嘅學生未能負擔高額學費,學院決定同佢哋共度時艱,允許佢哋用椰子或特定植物嚟代替學費。

位於峇里省吉安雅縣嘅維納斯一號觀光學院(Venus One Tourism Academy),因應無辦法支付學費嘅學生先制定咗分期付款嘅方式,將佢哋嘅學費分成三期俾,希望可以減輕學生嘅負擔。院長Wayan Pasek Adi Putra表示,但近期好多學生家長失業,學生根本無錢交學費。後來院方了解到唔少學生屋企都有種椰子樹,於是諗到用椰子嚟代付學費。

學院平時都會生產椰子油嚟賣,於是院方早前向當局申請,獲准用學生繳交嘅椰子製造椰子油出售,仲可以俾學生自行轉售。院方仲歡迎學生用辣木葉、積雪草嚟代替學費,因為呢啲都係製作草藥香皂嘅材料。院長認為呢個係雙贏嘅辦法,學院既可以出售椰子油幫補收入,學生又可以繼續學業,仲教育咗佢哋隨時利用身邊資源同優勢,期望佢哋喺疫情過後,可以被訓練成唔止係一個普通員工咁簡單。

圖:FB@Venus One Tourism Academy,網上圖片