新冠肺炎肆虐全球底下,大家都明白到保持社交距離嘅重要性,不過原來蝙蝠都識保持社交距離,病嗰陣會同同伴保持距離,避免群體一齊染病。

美國俄亥俄州立大學演化生物學系嘅研究小組,喺學術期刊《行為生態學》發表咗一項研究成果,佢哋追蹤咗31隻棲息喺同一樹窿入面嘅雌性野生吸血蝙蝠,並將佢哋分成兩組。其中16隻注射咗一種會令免疫系統出現短暫反應嘅藥水,令佢哋感覺好似病咗咁,而其餘15隻就注射一般生理鹽水。

蝙蝠係一種群居生物,佢哋會互相幫忙清潔身體、分享食物。而實驗結果發現,「病咗」嘅蝙蝠大多數時間會留喺巢內瞓覺,避免接觸同類,減少外出覓食之外亦唔會參與群體嘅日常清潔互動,直至2日後「病情」消失為止。研究負責人Simon Ripperger將呢種現象稱為「被動保持社交距離」,同人類病咗只想獨自臥床休息嘅行為相似,咁樣可以減低疾病喺群體內傳播。

圖:網上圖片