美國紐約一對情侶近日喺裝修屋企嘅時候,意外發現咗66枝禁酒令時期嘅威士忌,而專家更估計呢一批威士忌價格高達3.3萬美元(約港幣$26萬)。


根據外媒報導,30歲建築師尼克(Nick Drummond)同29歲嘅園藝師派翠克(Patrick Bakker)舊年以18.3萬美元買落一棟屋齡105年嘅老屋。而佢哋近日喺裝修間屋嘅時候,就喺一個用稻草、紙張同繩包著嘅包裹入面,發現咗6枝1923年嘅威士忌。


之後佢哋一共喺地板下面同牆壁入面發現咗66枝同類嘅威士忌,而其中有15枝仲係滿嘅。賣酒專家估計,每枝威士忌大約值500-1000美金,總價值高達3.3萬(約港幣$26萬)。


其實早前有傳聞指出該間老屋嘅前屋主阿道夫(Adolph Humphner)曾經喺1920年至1933年嘅禁酒令時期走私酒精,而呢對情侶今次嘅發現可以話係間接證實咗呢個傳聞。對於呢個意外收穫,尼克就表示自己會拍賣部份威士忌,並捐贈部分空酒樽比當地嘅歷史單位做研究同展示。


佢哋發現威士忌嘅過程:


圖片來源:Instagram@bootleggerbungalow