嚟到天水圍,只要繞住輕鐵天水圍循環線行,就會發現幾乎每隔一兩個站,就係一個公共屋邨或居屋,天恒邨、天逸邨、天澤邨、天恩邨、天華邨、天瑞邨、天耀邨、天慈邨、天晴邨、天悅邨、天富苑、天盛苑、天祐苑、天頌苑等等……當中領展商場就有T Town、天澤商場、天耀廣場、天盛商場、天瑞商場同天慈商場,可以話居民生活同屋邨及商場息息相關,形成一個非常獨特社區。今日就帶大家游走天水圍,發掘個城市後花園獨有魅力

美化商場 展現開心生活

天水圍最大嘅特點,就係無乜舊區,無舊式街市,無舊式嘅街道,居民嘅日常生活,往往離唔開商場,好處就係比較乾淨企理,舒適方便,足不出商場就解決到生活所需。近年領展商場亦經常進行美化。由即日起至1220日期間,領展就聯乘由本地插畫師Isabel Tong創作的Isatisse眼袋女孩,推出「愛在天水圍」活動,設有13個眼袋女孩打卡場景,以不同角色及造型引領大家來趟天水圍一日遊!

今次Isabel Tong筆下眼袋女孩會化身成天水圍居民,以愛.嚐食愛.購物愛.運動愛.煮意愛.暢玩五大主題同大家介紹各商場嘅特色Isable Tong表示:「我希望可以將天水圍開心生活、輕鬆生活展現出來,令天水圍嘅市民可以感受到『愛天在天水圍』呢件事。」

社企便利店 方便街坊

喺領展商場入面,亦有好多民生商店,例如位於天慈邨嘅「家園便利店」,就為當地居民提供一個便宜又就腳嘅選擇。家園便利店店長林姑娘表示,天水圍南部較缺乏街市,天慈邨天耀邨都無街市,最近已經係天盛商場,家園便利店就成為大型超市之外嘅選擇。喺疫情期間,佢哋不但派發酒精搓水手液及愛心家園米,亦特別推出兩款湯包—抗疫健肺湯包及健脾去濕湯包,希望可以增強街坊嘅抵抗力。

林姑娘2008年嚟到天水圍區工作,8年前轉到家園便利店,佢對呢個社區讚不絕口:「呢度人情味好濃。例如端午節時,有啲會員會包糉俾我、龍眼季節有人會送家鄉龍眼俾我。」佢仲話好多客人或同事,後嚟都變成朋友。

呢十幾年間,佢亦睇到天水圍區嘅變化:「最大轉變係交通方面,依家變得四通八達。記得2008年初嚟天水圍時,我返工車程要1小時40分,自從西鐵開通之後,就方便得多,1個鐘內就可以到達。」

佢又感受到天水圍嘅多元化:「呢度有南亞裔、印尼裔、泰國裔、越南裔,仲有新移民。」林姑娘粗略估計,每日平均有廿多位南亞裔幫襯佢哋,而佢哋推出一啲針南亞裔嘅產品,例如清真食物等。

天水圍街坊 最愛空氣好

雖然並無規定,但現時佢哋店舖6位店員,剛巧都係嚟自天水圍區,而且更係咁多間唯一全女班嘅分店,林姑娘覺得,天水圍婦女相對較勤力,佢哋願意為屋企付出,普遍責任感好強。

任職家園便利店嘅阿勤,97年搬入嚟天水圍,當時天慈邨剛剛落成:「我哋鍾意呢度空氣好,地方大,馬路夠闊,就決定搬入嚟。」即使天水圍曾被標籤為「悲情城市」嘅日子,佢哋都唔覺得天水圍好恐怖,「其實負面新聞區區都有架啦!」阿勤表示。

林姑娘任職便利店嘅8年間,亦明顯感受到當地居民嘅情緒改善咗好多,「見到佢哋笑容輕鬆咗,講嘢正能量多咗,近年少咗好多負面新聞啦。」

自然風光 文化保育

其實天水圍並非只得屋邨,因為屋邨同屋邨之間,有好多唔同社區設施,而天水圍嘅四周,亦都有好多自然及歷史景點。林姑娘表示,近年政府投入社區設施多咗,令社區更完善,所以近十年來天水圍一啲都唔悲情。

阿勤亦表示,天水圍呢幾年變化好大,「屋邨多咗,設備多咗,例如有體育館、運動場,小朋友可以去打波。天水圍公園同濕地公園都好好,令我哋假期都有地方可以去。」阿勤坦言平時都好少離開呢個社區,「呢度自給自足,有工作又有社區設施,就唔使去第度啦!」

Isabel Tong亦話:「由於今次工作,對天水圍接觸多咗,了解多咗。發現天水圍係一個好多元化嘅地方,呢度有好多大自然嘅景色,又有文化保育,又有大型商場。所以我今次特意做咗個尋寶圖,介紹呢區嘅不同地方。」

Isabel Tong建議大家可以先到商場領取「探索尋寶圖」,跟住地圖推介深度遊路線嚟一次「天水圍一日遊」,天盛商場為起點,食完早餐後可到屏山天水圍公共圖書館影相打卡,再到隔籬嘅聚星樓參觀了解歷史古蹟之後到天水圍公園過一個悠閒下午,再到有「天水圍後山」之稱淋坑山日落,最後T Town美食作結

圖片來源:LOOOP.HK、領展


Isable Tong希望可以將天水圍開心生活、輕鬆生活,透過打卡場景展現出來。


喺天盛商場街市,就有Isatisse眼袋女孩陪住搵食。


Isabel Tong因為今次工作,對天水圍接觸多咗,了解多咗,佢覺得天水圍係一個好多元化嘅地方。


天慈邨同天耀邨都無街市,呢兩個邨嘅居民想去街市,最近要到天盛商場。


林姑娘(右)及阿勤都齊讚天水圍空氣好。


家園便利店提供好多便宜嘅貨品,成為大型超市以外嘅選擇。


喺疫情期間,佢哋特別推出兩款湯包,希望可以增強街坊嘅抵抗力。


屏山天水圍公共圖書館建築設計好特別,係影相打卡嘅好地方。


聚星樓係屏山鄧氏族人所興建,有超過六百年歷史,為香港法定古蹟。


天水圍公園位於天水圍嘅心臟地帶,為當地居民提供一個寬敞、令人身心舒暢的休憩環境。


天水圍公園佔地14.86公頃,以亞熱帶特色為設計主題。


天水圍西面有條天水圍河,係廈村同新市鎮嘅分界線,河道兩岸仲設有河畔公園。


天水圍內有好多康樂體育館,令區內居民唔使成日都屈喺室內。


天水圍區內有多個領展商場,T Town係其中之一。


T Town內有個美食中心T Market,布置仲好有日本Feel添。


天水圍景點分布圖