外國嘅萬聖節通常都會玩「Trick or Treat」,唔少家庭準備好糖派俾小朋友。不過美國一對夫婦今年就擺咗個告示喺門口話,因為佢哋嘅女兒正同癌症搏鬥緊,所以無準備到糖果派。點知之後就發現告示下面堆滿糖,原來係經過嘅小朋友們見到告示之後,主動同患癌嘅女兒分享,為佢打氣。

住喺美國亞特蘭大嘅Courtney Thomas,因為女兒患上癌症,正接受治療,佢幾日前預計自己今年準備唔切糖果,派俾到訪嘅小朋友。為咗唔好令小朋友嚟到屋企門口先失望而回,佢特登整咗告示牌放喺花園,寫住:「抱歉,沒有糖果,家有患癌孩子。明年再見!」

點知萬聖節過後,Thomas發現告示底下放咗大量糖果!佢翻查門口錄影發現,原來好多小朋友經過佢屋企嗰陣,都會停低望一望告示牌,仲會擺低自己取得嘅部分糖果,分享俾佢個女。

Thomas好感動,將呢件事分享到社交平台,並答謝相關嘅小朋友同佢哋嘅父母,「如果這些小朋友的父母看到了這帖文,請告訴他們,這對我們和孩子意義重大!在一年中最棒的糖果之夜,孩子們能自願並慷慨地與陌生人分享,表現出如此的愛心和關懷。」

圖:FB@Courtney Thomas