近年足球直播就引入咗 AI 攝影機,去追蹤足球嘅位置,並自動調整拍攝角度同方向。不過係近日一場足球賽事入面,AI 攝影機竟然將旁證嘅光頭認咗做足球,然後幾乎全場追蹤著旁證,令到收睇直播嘅觀眾睇足90分鐘「頭」。


出現問題嘅係呢一場蘇格蘭足球隊 Inverness Caledonian Thistle FC 對上 Ayr United F.C.嘅賽事。係直播片段可以見到,雖然攝影機有影到真正嘅足球,但佢時不時將焦點轉移到旁證身上,令到電視觀眾淨係睇到旁證,甚至連係賽事50幾分鐘出現嘅入球都錯過埋。


由於疫情嘅關係,球迷只可以透過收費直播觀看賽事,而直播嘅時候出現呢種問題相信佢哋都難以接受。好彩蘇格蘭足球協會發言人隨後就表示,已經留意到鏡頭的問題,攝影機供應商亦修復緊有關設備。




圖片來源:Youtube 影片