阿茲海默症,俗稱老人癡呆症,係一種慢性神經退化疾病,特徵之一係腦內異常積聚「β-澱粉樣蛋白」。所以用實時影像顯示腦內「β-澱粉樣蛋白」嘅狀況,對診斷阿茲海默症同監察病情發展非常重要。而香港浸會大學就研發咗一種嶄新嘅磁力共振掃描顯影劑,可實時顯示、探測「β-澱粉樣蛋白」喺腦內積聚嘅大小同數量,對未來進行阿茲海默症嘅早期診斷、恆常普查,以至評估藥物療效帶來希望。

現時為「β-澱粉樣蛋白」成像嘅臨床方法正電子放射斷層掃描,費用高昂,具入侵性、放射性不特止,解像度亦有限。而另一種成像方法磁力共振掃描,就需要用顯影劑提高影像能見度。不過,現時臨床上並無獲認可嘅磁力共振掃描顯影劑,可實時顯示人腦內嘅「β-澱粉樣蛋白」。而由浸大化學系教授黃文成教授、李紅榮教授帶領嘅研究團隊,研發出嘅納米材料,就可用於「β-澱粉樣蛋白」成像。

團隊利用一種常用作磁力共振掃描顯影劑嘅化學物質、含有金屬「釓」嘅納米顆粒,喺其表面塗上特別設計、可以附帶一種熒光花青素染料嘅矽塗層。呢種花青素染料係無毒嘅,可清晰顯示「β-澱粉樣蛋白」嘅影像、數量,更加唔會對神經造成傷害。

李紅榮指:「我們的發明在阿茲海默症的早期診斷和恆常普查方面有很大潛力。它亦可協助監察病情的發展,以及評估潛在藥物的療效。」如果能夠成功研發針對阿茲海默症嘅磁力共振掃描顯影劑並投入臨床應用,就可以大規模普查該病症,等患者盡早接受診斷、治療。

圖:浸大