雖然宜家電子付款方式發達,但仍然有唔少商鋪,好似街邊嘅報販等都只係收現金。所以一個唔覺意收到假幣,真係可以話係白做成日。有報販近日就收到張像真度極高嘅500蚊假鈔,呢啲假鈔據悉係內地銀行專門整嚟俾銀行職員練數銀紙嘅「練功券」,係禁止流通嘅,但就有人「搏大霧」以假亂真當,認真無良!

「全港報販大聯盟」喺其Facebook專頁發文指,近日有報紙檔收到一張面值500蚊嘅練功劵,同真鈔有8成相似,但兩面都印有「練功券」字眼。不過騙徒就用塗改液塗咗其中一面嘅「練功券」字眼,仲要摺埋「搏大霧」咁俾報販,報販睇漏一眼就中招。文中仲提到,有時報販一個人睇檔,如果同時有兩三個客一齊來問嘢買嘢,分身不暇就出事,而收到一張假銀紙更會令報販損失兩日收入!

全港報販大聯盟最後呼籲各位:如果不幸收到假鈔,「都千祈唔好諗住洗咗佢就當唔知!一定一定要報警處理!」

圖:FB@全港報販大聯盟