單親媽媽要湊大個小朋友真係唔易,日本有位單親媽媽伊與田美貴就曾經因為窮到燶,而打算帶住囡囡一齊自殺,人生最低谷嘅時候佢試過銀包入面得103円。不過伊與田美貴宜家已經係個身家過億、住3層豪宅嘅女富豪,究竟佢係點樣鹹魚翻身、谷底反彈嘅呢?

根據日本節目《「任意同行」願えますか?》,伊與田美貴之前只係一個普通嘅家庭主婦,佢同前夫育有一個女兒,原本一家三口相當幸福。可惜佢同前夫離婚之後,要獨力湊大當時得3歲大嘅女,曾一度窮困潦倒到想帶埋個女自殺。好彩嘅係,喺美貴最絕望嘅時候,收到一位舊客人嘅電話,從此改變咗佢嘅一生。

原來美貴曾經係花藝設計師,呢位舊客人係佢8年前嘅第一位客人。客人偶然喺屋企見到美貴用假花做嘅作品之後,諗起好耐無聯繫嘅美貴,於是打電話俾佢邀請佢一齊創業。兩人合作成立咗一間「粘貼式gel甲片」嘅公司,專門賣可以重複使用嘅gel甲片,啱晒嗰啲想去gel甲又怕麻煩嘅女仔。由於日本嘅gel甲服務閒閒地都要2萬円(約1400港幣),美貴賣嘅gel甲片雖然價錢同gel甲服務差唔多,但勝在可以重複用,自然就吸引好多女士幫襯。就係咁,美貴成功賺到佢嘅第一桶金,之後搖身一變成為年賺6億円(約4440萬港幣)嘅女社長!

美貴仲喺節目度分享話:「保持微笑和樂觀開朗的心境,只要找到這兩樣,好運便會來。」

圖:IG@miki_iyoda