擁有近百年歷史,為全香港車齡第二大嘅313火車卡早前就加入咗香港鐵路博物館,成為咗新嘅展品,比公眾參觀。相信年輕一輩都未見過同313號同類型的車卡,不過大家可以試下問下爺爺嫲嫲,話唔定你會發掘好多以往發生係火車上嘅故事!


313號火車卡係1921年投入服務,屬三等車卡,主要行駛尖沙咀至羅湖段。1980年代初,九廣鐵路全面電氣化,313號火車卡就正式退役。文化博物館一級助理館長曾志雄表示,313號火車卡見證了兩個不同動力年代,最初是由蒸氣機車帶動車卡,後是由柴油推動。


為咗令313火車卡可作展覽之用,甚至可以比巿民登上車廂參觀,文物修復辦事處係準備工作上可以話係做足工夫。首先,由於火車卡長期存放在戶外,車身出現鏽蝕同損毀,所以係文物修復辦事處嘅團隊係修復車卡嘅時候除咗要仔細去除鏽蝕部分,更要小心翼翼咁修補損毀嘅車身,以及重新塗上油漆。

 

而係修復工作完畢後,團隊仲要面對更加大嘅考驗,因為佢哋要將313號火車卡由長沙灣嘅船廠運去大埔嘅鐵路博物館,而呢個更加係香港博物館歷來最大型嘅陸路運送文物項目。文物修復辦事處館長謝志遠解釋指,313號火車卡長近20米、高近五米,重量達32噸,體型龐大。運送嘅時候要仔細考慮路面每條街道和彎位是否足以容納佢,再進行風險評估,才擬訂運輸方案。


團隊經多次諮詢不同政府部門,包括運輸署、路政署、警務處等,並進行試運,先敲定出一條唔經隧道,並長達60公里嘅路線。而運送隊伍就係今年5月底嘅一個凌晨,經青葵公路、屯門公路、新田公路、上水、粉嶺,成功將313號火車卡送到大埔。


圖片來源:政府新聞網、康文署