患上血癌本嚟係一件痛苦嘅事,但喺治療期間遇到一個同病相憐嘅人,兩個人互相鼓勵支持,痛苦就少得多喇!據外國媒體People報道,同樣患上罕見血癌嘅Molly Gorczyca同Ryan Smith就係因為咁而認識,最後更發展成情侶,一齊抗癌、康復。

嚟自美國新澤西州、21歲嘅Molly Gorczyca,舊年4月確診患上急性骨髓性白血病(Acute Myeloid Leukemia),由於呢個病多數唔會發生喺45歲或以下人士身上,所以屬於罕見癌症。機緣巧合下,Molly喺社交平台見到高中同學轉發咗一篇題為《籃球勇士抗癌》嘅文章,然後發現呢位高中同學嘅大學同學Ryan Smith,竟然同佢患上同一種病。更巧合嘅係,Molly同Ryan喺確診前都係大學運動員。

出於同病相憐嘅心情,Molly聯絡咗Ryan,兩人一直維持網上交流,互相加油打氣、共同抗癌。直至Molly喺今年3月,親身到病房為Ryan接受移植手術而打氣,兩人嘅感情進一步升溫。而Molly亦喺舊年10月成功接受骨髓移植,宜家兩人嘅康復進度良好。Molly形容,從未試過同其他人有呢種聯繫,無論發生咩事,Ryan總會喺身邊支持佢。

圖:IG@mollygorczyca