好多人都話,香港已經無農業!不過其實仲有好多有心人,為咗香港農業盡心盡力,就好似歐羅有機農場場主阿Wing,本來係管理層,11年前毅然回到大江埔村租田耕種,近年更刻意培訓大學生Kelly,希望佢將來可以接棒,佢哋兩人都話,耕種雖然辛苦,但為咗推廣香港農業,辛苦都係值得!正如阿Wing話齋:「我唔係做農夫,我係做農業。」

田中之子 回歸大江埔

Wing本身係大江埔人,人稱「田中之子」,佢母親種菜時喺農田生佢,阿Wing可以話一出世就與農田有緣。不過,出身於農民家庭嘅阿Wing,年輕時卻打死都唔想做農夫,所以努力讀書以求入讀大學,結果佢如願「脫農」,大學畢業後從事電子行業,一做就廿年,但11年前,卻決定回到大江埔村租田耕種,佢解釋:「我做電子業務嘅,經常接觸客戶嘅工僘,見到深圳廣州剷平農田設廠,旁邊全部都係農田,種出嚟嘅食物全部都被污染,後嚟跟朋友講開,大家都好擔心食物的問題,覺得自己同身邊人都要承受污染嘅惡果,就開始思考,如果我放低現時嘅生活,回到農田,自己接唔接受到呢?」阿Wing自問唔係追求虛榮嘅人,又覺得如果踏實去做,唔使餓死就可以,太太雖然唔太贊成,但都尊重佢嘅決定,而兩名小朋友更加非常支持,於是決定回到大江埔村務農。

傳統農業 融入現代管理

雖然歐羅有機農場都加入咗少少教育元素,星期六開放參觀,以推廣有機耕種,但並非休閒農場,而係生產農場,主要收入都靠農田收成。阿Wing回憶道:「開始時並唔容易,一個人去開荒,所有工作都自己做晒,用咗3個月先開始種植,半年後有收成,1年後就做到收支平衡!其實好多農場由開始至結束,都未能做收支平衡。」

一切並非幸運,曾擔任管理層嘅阿Wing,明白務農一樣要做好管理工作,所以佢一開始就決定唔做批發,改做直銷,而且要好好Manage自己嘅Manpower,生產時間做生產,營銷時做營銷,休息時做思考。「耕田時唔開電話,客戶只能透過網上預購,到晚上我就開始做落單,早上就去派菜。」阿Wing表示。

安排接班人 為交棒作準備

近年農場又有新發展,聘請咗年輕大學生Kelly,阿Wing坦言希望Kelly有一天可以接棒:「我哋農場係家庭式經營,全部年紀都大,我嘅小朋友又未必想入行,為咗將來發展,就要搵接班人,剛好遇上Kelly,觀察佢嘅言行,覺得佢有責任感,對農業有一定喜好,係合適嘅接班人選!」而且阿Wing認為年輕一輩學識視野跟自己不同,接收資訊快,運用工具能力強,阿Wing希望可以協助佢快速成長,甚至超越自己,為香港農業發展作出貢獻!

Kelly大學主修地理,本來對農業認識唔多,後來接觸農業學會,發現香港原來仲有農業,加上本身喜歡大自然,開始想做多啲事嚟推廣農業。

其實Kelly讀大學嘅時候,從無諗過做農夫,覺得需要好多專業知識,自問做唔嚟,機緣巧合下,喺另一農業機構認識阿Wing,獲阿Wing邀請加入,而佢嘅心態亦開始改變,對農業產生興趣,覺得假如想推廣農業但又唔認識農業,會有啲「離地」,一定要親身落田,先可以對本地農業有一個Full Picture。年輕女子竟然去耕田,Kelly直言家人起切都反對,覺得耕田又辛苦又無前途,「但我堅持下,佢哋都奈我唔何!」

初初嚟到大江埔村嘅時候,Kelly並唔習慣,體力勞動對佢嚟講並唔輕鬆,而夏天真係好熱,加上蚊叮蟲咬,隨時被廿幾隻蚊包圍住,不過佢話依家已經適應咗:「初接觸時都覺得好難掌握,例如開坑就唔容易,但做做吓就掌握到。」

對農業觀感 逐漸改變

對於香港農業,佢哋兩人都唔會睇得太灰,阿Wing話:「大家對農業嘅睇法改變咗,以前大家覺得農夫無學識,依家多咗人覺得農夫係一門專業,明白到農夫要有技能,有管理,有營銷,大家對農夫同農業多咗尊重。」Kelly則一半樂觀一半悲觀:「香港農業既有希望又無希望,香港環境對農業的確唔友善,但香港人最叻應變,變變吓未必無生存方式!」Kelly亦覺得,近年年輕人對農業嘅興趣增加咗,對農業感覺變得正面,佢仲話身邊唔少朋友都會落手落腳耕田!

Kelly認為,本地農業可以試多啲唔同方向,例如唔同嘅銷售方式,包括做批發、直銷、送貨上門等等,亦可以同社區合作,大家一齊推動農業。例如歐羅有機農場就同大江埔村好多農場合作供菜賣菜,又同社區共購合作,呢啲都喺嘗試階段。

Wing亦認為,現時自己做嘅模式,大家可以參考:「我希望可以開路俾其他人,等大家知道喺香港做農業也可以生存到,希望可以吸引更多人入行,就算是完成使命。」

圖片來源:LOOOP.HK、歐羅有機農場


阿Wing係大江埔人,11年前決定回到大江埔村租田耕種。


阿Wing一開始就決定唔做批發,改做直銷,近期更做埋共購添。


每逢假日,佢哋會出席大大小小市集,推銷產品。

阿Wing表示,經過多年努力,佢嘅農場比初創時擴大咗幾倍。


阿Wing希望大家知道,香港都可以有本身嘅農業。


Kelly大學畢業後,喺機緣巧合下,決定轉行務農。

Kelly表示,開頭覺得開坑並唔容易,但做做吓就掌握到。

阿Wing希望Kelly將來可以接棒,繼續推廣香港農業。