今個週末就係萬聖節喇,喺歐美國家唔少家庭都已經佈置好屋企,為萬聖節做好準備。不過喺美國加州河濱市(Riverside),就有一個家庭將間屋佈置成火災現場,但因為太過逼真,引嚟唔少誤會。

由相片可見,呢間屋嘅窗戶內用上白色嘅布簾裝飾,再用橙紅色嘅燈光照射到白布上,布簾隨風晃動,由外面睇落好似發生緊大火咁,逼真到有路人多次通報警察同消防,要警察同消防員上門查看。

當地傳媒報道,呢個家庭早喺3年前就開始規劃以「加勒比海盜」為主題嘅萬聖節佈置,屋主Carmen Long表示,「由前門嘅骷顱頭開始,我哋喺後面加上一艘船同大砲,假裝側面開火,並用煙霧製造驚悚效果」。呢個逼真嘅佈置引嚟唔少民眾圍觀,而當地警方亦已經同屋主溝通好,喺夜晚著燈前要先通知警方同消防,以免民眾虛驚一場。有唔少路人都表示「佩服屋主嘅設計」、「太有創意」,又話好似真正嘅火災,希望入去睇下。

原圖:Twitter@Jojo99275148