一次性塑膠用品為我哋帶來方便嘅同時,亦增加咗海洋環境嘅負擔,嚴重危害到海洋生物嘅生命。今個月中8號風球浪卡襲港嗰陣,有熱心市民聯絡facebook專頁「海洋動物影像解剖研究組」指,喺深井雙仙灣發現一隻海龜屍體。而研究組透過解剖發現,海龜嘅消化系統除咗小部分係食物同糞便外,其餘全部都係海洋垃圾,例如膠袋同包裝紙等。研究組最後呼籲大家:「記得千祈唔好亂拋垃圾!」

「海洋動物影像解剖研究組」喺其facebook專頁發文指,今次發現嘅海龜屍體係近期研究組協助漁農自然護理署(漁護署)處理嘅第二隻海龜。由於呢隻綠海龜尚未成熟,無辨法推斷佢嘅性別,但就唔算太腐爛,部分器官依然完整。研究組透過影像解剖發現,海龜嘅食道、胃部同腸道有食物同異物,尤其係食道明顯脹大。再通過解剖發現,海龜嘅消化系統入面大部分都係海洋垃圾,包括膠袋、飲品包裝紙,甚至有完整嘅膠手套等。研究組表示,雖然呢個並非100%肯定係海龜嘅死因,但仍可以清楚見到海洋垃圾正影響緊海龜。

海洋動物誤食塑膠垃圾有機會造成腸道阻塞,引致消化系統潰瘍同穿窿,最後導致動物死亡。早前研究組發現嘅第一隻海龜屍體,就係因為誤食塑膠垃圾而導致腸道阻塞同穿窿而死。所以研究組喺文末呼籲大家千祈唔好亂拋垃圾,除咗唔好拋垃圾落海之外,市區同郊區棄置嘅垃圾都有機會透過風雨或溝渠等渠道流入大海,危害海洋動物嘅健康。

圖:FB@Aquatic Animal Virtopsy Lab 海洋動物影像解剖研究組