同一位在囚人士結婚,並唔係一個容易嘅決定。喺美國,就有一位大學講師同一位干犯謀殺罪嘅在囚人士墮入愛河,而呢位在囚人士喺25年後、即係2045年先至出獄,但呢位講師仍然願意同佢結婚,並且上個月喺監獄完婚。佢哋嘅故事好快成為網絡熱話,仲得到唔少網友嘅祝福添。

外國傳媒報道,美國華盛頓大學講師兼政治系博士候選人Chelsea Moore,喺2017年嘅夏天自願去到華盛頓州門羅監獄,向在囚人士教授憲法公民自由課程,結識佢嘅學生、曾經干犯謀殺罪嘅Christopher Blackwell。

Christopher現年39歲,喺華盛頓州塔科馬市長大,當地喺1980年代末出名幫派暴力盛行,Christopher喺12歲嘅時候曾經因為偷車入獄,其後多次出入監獄。喺2003年,Christopher謀殺一位17歲少年,2007年被判一級謀殺罪成,判處38年監禁,要去到2045年先至可以出獄,期間唔准假釋。

Christopher喺獄中認真讀書,獲西雅圖中央學院(Seattle Central College)頒發副學士學位,而家仲差幾個課程就可以取得科羅拉多州亞當斯州立大學(Adams State University)嘅政治系學士學位。Christopher又曾經撰文分享獄中經歷,投稿登上BuzzFeed新聞網。

Chelsea現年32歲,喺加州奧哈伊(Ojai)嘅富裕地區長大,佢同Christopher透過電郵聯絡,發現大家對音樂、電影同書籍有共同興趣。Christopher表示,當知道Chelsea曾經讀過佢嘅360幾頁犯罪檔案,仍然願意同佢一齊,就認定Chelsea係佢嘅「真命天女」。

佢哋二人上月18日喺監獄嘅會客室結婚,賓客只有監獄警衛、職員同兩名證人,Chelsea宣誓時表示:「我知道我哋一齊唔容易,但愛你好容易。我承諾不論面對啲咩艱難險阻都會愛你。結婚並唔係我哋要翻越嘅第一座大山,亦唔會係最後一座。」佢哋嘅故事喺網上熱傳,亦得到唔少網友嘅祝福。

原圖:華盛頓大學