海外升學對學生嚟講,係一個好難得嘅機會。教育局日前宣布,已甄選92名傑出本地學生為第6屆香港卓越獎學金計劃獎學金得主,獲資助到海外知名大學升學。當中包括72人升讀學士學位課程、20人升讀研究院課程。呢92位得主修讀嘅學科遍及多個範疇,當中超過3分1修讀同STEM(科學、技術、工程和數學)有關嘅課程,其餘學科包括法律、文科、文化及表演藝術、醫學及健康科學及社會科學等等。

教育局局長楊潤雄喺Facebook表示,今年到海外升學嘅同學,難免受到當地新冠病毒病疫情影響,但同學都盡力適應,努力學習。佢深信,同學會好好珍惜得來不易嘅機會,汲取更多知識同經驗,豐富國際視野,期待佢哋他日學成歸來,一齊努力建設香港。

獎學金計劃喺2014年11月推出,由2019/20年起恆常化,至今一共有562名學生受惠。獎學金計劃旨在資助本地學生升讀境外知名大學,培養具備環球視野、國際網絡,以及一流教育水平嘅頂尖人才,提升香港喺全球化知識型經濟環境下作為亞洲國際都會嘅競爭力。

原圖:FB@University of Oxford