香港嘅新冠肺炎疫情緩和,學生已經可以返校復課,但有啲國家嘅疫情仍然嚴峻,需要繼續以網上形式上課。喺美國,有一位小學生因為媽媽失業,無法負擔上網費用,需要每日返學校門外借用WiFi,又用紙皮箱當書檯咁用嚟上堂,場面令人心酸。

外國傳媒報道,美國新墨西哥州一位老師Sabrina Talbott Harbor早前喺Facebook發布咗一張相,入面一位讀緊小四嘅9歲男童Jonathan Endecott,瞓喺學校門外,用緊學校嘅WiFi上堂。Sabrina表示,已經見到Jonathan多日,令佢深受感動,於是分享照片。Sabrina喺帖文表示,Jonathan家中無互聯網,Jonathan每日起床就徒步返學校,連接學校嘅WiFi,由上午8時坐到下午2時45分。

報道又提到,Jonathan嘅媽媽Angel接連失去2份工作,令屋企出現經濟壓力,佢表示兒子個性獨立,而且住喺學校附近,所以Jonathan決定每日行返學校借WiFi,而父母都放心俾佢自己返學校。Jonathan就表示,好開心,形容返學校借WiFi有回到校園嘅感覺,可以再次好似普通小朋友一樣。

Sabrina為Jonathan一家發起籌款活動,幫助佢哋度過難關,現時已經有好心人幫助支付一年互聯網費用,Jonathan亦好開心可以同朋友、同學網上傾計。

原圖:FB@Sabrina Talbott Harbour