無現金喺手就用貴重物品代替車費,咪以為呢種劇情睇戲先有,現實一樣會發生。有位的士司機接載咗一名飲醉酒嘅女乘客之後,女乘客唔夠現金俾車錢,於是除咗隻錶俾司機當78蚊車資。司機一查之下先發現隻錶價值2萬,決定將隻錶物歸原主,最後女乘客信守承諾,將錶送俾司機。

呢位的士司機喺FB群組「的士司機資訊網 Taxi」發文指,自己開夜嗰陣喺蘭桂坊接咗個女乘客上車,當時女乘客都幾醉下。到咗山村道,女乘客落車但就發現唔夠現金俾車錢,於是除咗隻錶俾司機話當車費,仲話有多嘅當貼士。司機好奇之下就去當鋪問問隻錶嘅價值,原來值成2萬蚊!司機上網搜集網民意見之後,再三衡量都係將隻錶物歸原主,無謂因次令自己惹上麻煩。

於是司機再次到山村道搵返個女乘客,還返隻錶再收返車資就算。點知女乘客當晚都唔醉得晒,佢完全知自己做緊乜,但佢估唔到司機會嚟還錶。而女乘客最後信守承諾,將隻錶送俾司機,佢哋仲請看更做見證添。司機文末表示唔會賣咗隻錶,要「時刻戴住提醒自己做一個唔貪心、多做好事嘅人。」

圖:FB@的士司機資訊網 Taxi