結婚咁大件事,梗係要隆重其事喇!不過老一輩以前生活比較艱苦,結婚都係一切從簡,廣西北海市一對80幾歲嘅夫婦亦如此。為咗幫佢哋圓夢,21歲嘅乖孫賴家益特登借嚟頭紗、裙幫兩老打扮一番,影咗輯婚紗相。雖然相好簡樸,但兩位老人家笑得好開心,連網民都話佢哋「露出了發自內心最幸福的笑容。」

賴家益嘅爺爺嫲嫲今年已經87、83歲,佢哋當年結婚嗰陣無舉辦任何婚禮、成親嘅儀式,賴家益於是突發奇想幫兩人補影婚紗相。佢先準備自己嘅襯衫,又問姐姐借咗裙同頭紗,俾爺爺嫲嫲試著,之後就直接喺屋企門口影相。賴家益表示,爺爺、嫲嫲開始嗰陣有啲害羞,後尾就慢慢習慣:「奶奶(嫲嫲)後面有點想哭了,可能是比較感動吧」。兩位老人家仲有個心願,就係可以去北京天安門參觀,而賴家益就努力工作儲錢,準備出年新年假期帶佢哋去北京旅遊。

圖:微博@治愈系彩虹男孩