人類活動頻繁破壞環境,近年亦有唔少動物嘅覓食行為被逼改變。最近有片段影到一班北極熊集體圍住一架垃圾車,更有北極熊爬入車斗覓食,嚇到司機鼻哥窿都無肉!有網民對此為北極熊感到心酸,認為佢哋係太肚餓先咁做:「怪就怪人類破壞環境吧」。

俄羅斯新地島(Novaya Zemlya Islands)一架垃圾車近日因故障停喺雪地上,點知突然出現10隻北極熊,有大有細,一齊行過嚟圍住垃圾車。大隻嘅北極熊跟住爬上垃圾車,仲爬入車斗搵食,其中一隻北極熊更一度行去垃圾車前方直立,近距離同司機對望。而細隻嘅北極熊就喺一邊等候,不斷仰望,司機驚到即刻打電話求救。影片入面傳嚟多次響聲,似乎係拍片人嘗試協助驅趕北極熊,仲有人大叫:「看看現在所發生的事!這些熊非常餓,第四隻正在爬進去(車斗)!」

網民擔心司機安全嘅同時,又對北極熊嘅行為感到心酸,留言指:「這情形也太驚險了,被一隻飢腸轆轆的北極熊纏住已經有夠危險,何況現在是10隻?」、「北極熊是餓極了才會圍住垃圾車尋找廚餘,怪就怪人類破壞環境吧」。

圖:YouTube@The Siberian Times