今時今日,唔少人都機不離手,除咗一部智能手機,一個穩定嘅網絡都相當重要。早前,電信設備製造商諾基亞(Nokia)宣布,已經贏得合約,將會喺月球上安裝第一個行動網絡。唔通係俾太空人上網用嘅?

諾基亞表示,獲美國太空總署(NASA)選中,將會喺月球表面裝設一個「超小型、低功率且能承受外太空環境」嘅無線4G網絡,配合NASA喺2030年之前人類長駐月球嘅計劃。

呢份合約總值1410萬美元,係NASA阿提米絲計劃(Artemis)嘅一部分,呢個計劃目標喺2024年之前,先後將一位女性太空人同一位男性太空人送月球,進行詳細實驗同探勘,並藉此發展第一個載人火星任務。

原圖:NASA