唔係個個家庭都可以幫子女支付升讀大學嘅學費,有唔少學生尤其是來自基層家庭嘅學生,都係做下兼職或者散工,嚟賺取學費同生活費。喺墨西哥,有一位基層家庭出身嘅會計系學生,靠打摔角賺取學費,點知最近就喺一場比賽中死亡,有報道指佢嘅媽媽同女友當時亦喺現場。

26歲墨西哥摔角手沙拉薩(Luis Angel Salazar)係一位會計系學生,喺上週六(17日)一場比賽中猝死,起初報道指佢係死於心臟病發,其後修正為腦動脈瘤破裂。

根據網上片段,比賽對手拉迪米度(Redimido)打咗沙拉薩兩拳、踢咗一腳之後,拉迪米度回後正準備衝向沙拉薩嘅時候,沙拉薩突然倒地。拉迪米度同裁判隨即上前查看,期間場外有位選手以為係「假死」,衝上台踢向拉迪米度,其後發現事態嚴重,一同協助急救,醫護人員趕到之後,將沙拉薩移上擔架送院,但最終仍然不治。

當日報道稱,沙拉薩死於心臟病發,但後來有專門報道摔角新聞嘅網站指,沙拉薩嘅死因係腦動脈瘤破裂。

沙拉薩嘅朋友形容佢係個生活檢點嘅人,亦無任何惡習。沙拉薩生前利用摔角賺錢交學費,佢接受訪問時曾經表示自己熱愛摔角,藉住摔角而去過墨西哥唔同地方,同其他選手建立友誼,感受大家都對呢項運動嘅熱誠。

原圖:Twitter@GinoTOLDYOUSO