新冠肺炎疫情打擊全球航空業,國泰航空早前宣布重組方案,裁減超過5000名員工,當中包括大批空中服務員。有見及此,仁安醫院護士訓練學校特意為受影響嘅空中服務員提供機會,免費修讀醫護助理課程學位。完成課程後,可取得3A級病人服務助理資格,並且獲得仁安醫院優先錄用。

仁安醫院由即日起為空中服務員,提供100個名額,讓佢哋免費修讀醫護支援人員(臨床病人服務)課程學位。仁安醫院院長李繼堯表示,希望可以為有志轉行、投身醫療服務嘅空中服務員提供一個機會,又認為佢哋嘅工作態度同能力一定可以勝任到有關工作。

仁安醫院護士訓練學校校長袁偉傑表示,呢個安排係希望可以為相關空中服務員雪中送炭,讓佢哋繼續為社會貢獻。佢又提到,課程大約40人一班,由護士教師、資深專科護士授課,近8成嘅畢業生會獲仁安醫院優先錄用,平均月薪1.5萬元,主要工作係協助護士照顧病人,以及協助進行一啲基本護理程序,例如量體溫同血壓等。佢強調課程只係一個起步點,日後亦進修做登記護士或註冊護士。

課程原本學費3800元,以全日制方式上堂,修讀6個星期,完成後就可以獲得3A級病人服務助理資格。有關課程將於11月、12月,以及明年2月同3月開課,有興趣人士可到有關網站(https://www.union.org/nursingschool/crsw.php)申請,院方亦會視乎報名人數再決定會否「加碼」,增加免費名額。

原圖:大公報、仁安醫院