邊個話年紀大機器壞?英國有位80歲嘅退伍軍人仍然有心有力,佢唔單止利用廢棄物料自製船仔,更撐船出運河籌款,期望可以划到100哩(約160km),為慈善團體籌到1000英鎊(約1萬港幣)。

80歲嘅Michael Stanley係西薩塞克斯郡嘅前陸軍少校,佢退伍前曾喺皇家蘇格蘭龍騎兵近衞團當兵35年。早前為慶祝自己嘅80歲生日,Michael利用廢棄物料自製船仔,計劃每周喺奇徹思特運河划船2次,希望可以划到100哩,並為慈善團體籌款1000英鎊。Michael之前曾多次到訪印度,見到當地人用廢棄物料自製小船而受到啟發,利用廢鐵、窗簾鈎、水喉通等製成小船「鐵達尼號」。

「鐵達尼號」整得唔錯,Michael形容「無乜點漏水」,而多年嘅當兵經驗亦令佢好快可以駕輕就熟,每個鐘大概可以划到3.2km。由今年9月26號開始,Michael每逢星期三、六去奇徹思特運河划船,每次划4km。而佢嘅籌款目標喺第一日就已經超額完成,宜家已經籌到超過10000英鎊(約10.1萬港幣),佢希望可以喺12月18號前完成划船100哩嘅目標。

圖:BBC