今時今日無論係升學定係求職,都係經網上申請居多。近日,有一位喺大學負責收生嘅員工,就向Facebook專頁「生仔要考牌系列」投稿發文分享工作經歷,表示遇到唔少家長假扮子女查詢,最誇張仲試過有爸爸自稱係女兒本人,令佢大感無奈,又勸家長要「放手」。

呢位大學員工發文表示,大學收生已經轉晒做網上申請,有唔少申請人都會驚自己撳錯掣,尤其是唔確定有無交到報名費,都會打電話嚟問下,由於呢類查詢涉及申請人個人資料,涉及到私隱問題,所以都會問幾條問題確認對方身份。

不過佢坦言,大概有3至4成來電都係由家長打嚟,佢哋都會解釋清楚需要申請人本人打嚟,大部分家長都會理解,但就有啲個案,家長會隔一陣扮申請人再打嚟,爸爸扮兒子、媽媽扮女兒,但佢聽過同事分享,曾經有爸爸假扮女兒打嚟。當時同事問佢幾次係唔係本人,呢位爸爸都堅稱自己係本人,但最後位同事就踢爆,資料顯示申請人係女仔,呢位爸爸先至放棄。

樓主又話,唔少家長打電話嚟嘅時候,都會稱呼呢啲已滿18歲嘅子女做「小朋友」,佢指出喺電話中都聽得出,唔係「小朋友」唔識打電話,而係家長自己唔放心先打電話嚟。佢表示,自己無子女,但都希望呼籲家長可以放手,又認為要還呢班「小朋友」一個公道。

有喺診所工作嘅網民留言分享,曾經有位太太致電問佢「小朋友」嘅事,然而呢位「小朋友」實際上已經年過三十。亦有網民指出,其實問題並唔喺年輕人身上,而係啲父母唔肯放手。

原圖:大公報