一講起日本奈良,相信大家都會諗起當地啲鹿,每年都吸引唔少遊客去到當地餵鹿、影相。不過由去年開始,接連有鹿因為吞食膠袋導致死亡。有見及此,當地公司多間企業研發出名為「鹿紙」嘅袋,就算被鹿誤食,都唔會導致死亡,希望藉此保護當地嘅鹿。

「鹿紙」原材料包括用於牛奶包裝嘅再生紙漿,以及鹿餅中含有嘅米糠,同普通紙相比更易溶喺水,耐久性較弱但就算被動物誤食,都容易消化,對健康傷害較小。

參與開發「鹿紙」化妝品策劃公司「奈良ism」社長松川英朗表示,奈良鹿係當地旅遊業重要支柱,研發「鹿紙」既可以保護當地嘅鹿,亦可以保護奈良嘅經濟。奈良中央信用金庫已經率先購入3000個「鹿紙」,常務理事中田照夫表示希望援助當地企業,日後會繼續買入更多嘅「鹿紙」。

原圖:人民網、Twitter@binsan6767