生仔咁痛,唔少孕婦都會大聲叫出嚟,但內地西安一位聾啞孕婦就有苦叫不出,又無辦法聽到醫生護士嘅指示。於是助產士樊敏就打印定啲分娩注意事項,又喺孕婦生產途中用紙筆、手勢同佢溝通,最後聾啞孕婦成功分娩,母子平安。

10月初,內地西安市第四醫院婦產科接收咗一位26歲嘅聾啞孕婦,為咗確保分娩過程順利,助產士樊敏細心做好準備,用紙筆同孕婦溝通,又將醫生口述嘅叮囑寫成文字俾孕婦睇。樊敏又用電腦打印定一啲分娩注意事項,包括「現在呼氣,不用力」、「一定跟我好好配合,傷口就能小一些,不要用猛力」、「有什麼不舒服就告訴我」等喺分娩過程中使用。

直到聾啞孕婦分娩,樊敏都係靠手勢、紙筆去同孕婦溝通,安撫佢。樊敏話從未見過咁安靜嘅產房,佢起初仲擔心同孕婦溝通唔到會影響分娩,但係當佢摸摸孕婦嘅肚皮比劃要用力嗰陣,孕婦努力嘅樣令佢好感動。最後分娩嘅過程好順利,大概只係用咗20分鐘左右,BB好健康且母子平安。BB出世之後,樊敏亦有用紙筆記低話BB哭聲好響亮,希望啱啱分娩嘅媽媽可以感受到BB嘅生命力,媽媽睇完之後好激動,仲向醫護人員豎起大拇指,表示感謝。

不過樊敏回想起當時嘅情況亦百感交集:「當孩子一出世那響亮的哭聲,但媽媽自己卻聽不到,我覺得心裡有些不舒服及難受,然後就很想跟她拍照及擁抱她。」

圖:微博@陝西都市快報