政府今日宣布週五起本地旅行團人數放寬至30人,旅遊發展局對此表示歡迎,又宣布正式推出「賞你遊香港」活動,市民即日起只要喺本土零售及餐飲商戶實體店舖消費滿800元,就可以換取本地遊旅行團名額一個。

由今日開始,市民就可以儲起喺本土零售及餐飲商戶實體店舖單據,以最多2張機印收據計,滿800元就可以換取本地遊旅行團一個。喺下週二(27日),「賞你遊香港」本地遊旅行團嘅資料將會上載至網站(https://www.holidayhk.com/zh-hk/free-tours/),全部旅行團都半日或以上,包括導遊服務、來回交通、一餐膳食及基本保險,到時市民就可以瀏覽相關旅行團資料,向有關旅行社報名,而活動初步推出名額1萬個,先到先得。

旅發局表示,所有參與嘅旅行社都需要向香港旅遊業議會登記行程,並簽署旅議會制定嘅《本地遊防疫承諾》,確保「賞你遊香港」活動嘅本地遊旅行團會採取一系列嘅防疫措施。

原圖:FB@RTHK 香港電台