返工最根本嘅原因,當然係為錢啦!不過美國馬里蘭大學(University of Maryland)商學院教授Rellie Derfler-Rozin嘅研究就發現,當求職者表現得好關心薪酬同福利嘅時候,面試官通常都會傾向拒絕佢嘅求職。

Rellie訪問咗一位正準備進入一間小型新創公司第二輪面試嘅求職者Taylor Barnes,會喺面試前寫咗封email,詢問薪酬同福利嘅事。Email提到「我有另一個問題想問下,如果我最終得到呢個職位,你認為我會得到幾多時薪?會有福利嗎?唔好意思我只係覺得而家應該問下。」其後公司嘅人事部(HR)經理回覆時表明,Taylor嘅問題反映佢嘅優先考量同公司唔同,公司尋求嘅係追求挑戰同新機會嘅人,期望新同事係勤力同有毅力達成公司目標,而唔係注重福利,又表示週四嘅會面取消。但好彩公司嘅其中一位共同創辦人,知道事件之後立刻向Taylor道歉,並俾多次機會佢。

Rellie為咗確認「先詢問薪酬嘅求職者,錄取率較低」呢個推論,做咗一個實驗。佢將學生分成3組,第1組負責模擬寫求職信,投遞到希望加入嘅公司,第2組負責閱讀,搵出內在動力(工作符合興趣)同外在動力(薪水、福利、休假日)嘅字眼,而第3組就負責模擬HR主管,根據求職信決定請唔請。結果發現,喺信中展現出對福利、薪酬感興趣嘅人,較其他人低19%錄取機會。

喺另一個實驗,Rellie搵嚟一位專業演員參加唔同試鏡機會,有時會明確詢問薪酬同福利,結果發現有問呢啲問題嘅試鏡,被錄取嘅機會較無問低咗23%。

Rellie建議求職者,唔好咁快就詢問薪酬,應該等到知道公司希望聘請你,先至好開始討論。Rellie又認為,薪酬福利應該清楚公開,令面試可以盡量聚焦求職者嘅能力同特質。

原圖:新華社