為人父母者理應好好保護仔女,但有親媽竟然成日對個女惡言相向,嚴重傷害咗女兒嘅心理健康。有網民喺Facebook專頁「生仔要考牌系列」發文指,自己外母係一個「毒親」(toxic parents,意指父母利用自己嘅身份,以愛之名控制或不期然迫使子女跟住自己嘅諗法走,達到自我滿足),由細到大長期羞辱自己妻子,令妻子變得好自卑、零自信。而網民當然唔忍心自己老婆受苦,向外母反擊,以行動保護愛妻,仲呼籲廣大網友遇到類似事件,要好好保護另一半免收傷害,「確確切切咁Stand with her」。

網民指,外母係一個打麻雀、買名牌、唔會顧屋企嘅師奶。妻子細個成績都唔錯,例如考琴、英文拎全級第一,但外母唔單止無讚,更出口術不斷打擊妻子嘅自尊,例如會鬧佢:「醜」、「肥到豬咁」、「唔會有人要你」、「你老公第日一定會同你離婚」、「你咁樣搵到老公都唔會好得去邊」。妻子嘅前度男友亦曾被外母單打,最終分手收場。

直到妻子識咗網民,網民係師奶群口中嘅乖仔、叻仔,完全無位俾外母中傷,網民對妻子嘅好更成為外母心中嘅刺。但外母亦無放棄羞辱妻子,三番四次問網民「其實我真係唔知你鐘意我個女乜嘢」、「其實我個女有乜嘢值得你鐘意唧?」而每次網民都特登用最肉麻嘅說話答外母,以報復外母。網民同妻子結婚後搬出嚟住,妻子先喺網民屋企人身上體驗到親情,原嚟唔係個個阿媽都會數落仔女。但妻子宜家依然零自信,覺得自己唔配咁幸褔、事業唔應該上到呢個高位,網民可以做嘅只有減少佢兩母女接觸。而外母最近更因此同其他親朋戚友表示「個女唔理佢,只係顧男家」,仲話網民教個女唔孝順佢。

最後,網民呼籲大家,娶得太太入門,就有責任保護佢免受任何傷害。如果大家嘅另一半都深受「毒親」所害,就應該多聆聽、多了解,放低部電話,確確切切咁Stand with her。

圖:康健雜誌