新冠肺炎肆虐期間,唔少公司都實行在家工作以減少社區傳播,如果屋企無辦法好好工作點算?出街搵個人少少、靜靜地嘅地方做嘢都係一個唔錯嘅選擇。日本有個主題樂園最近推出一個「在樂園工作」特別計劃,開放摩天輪等打工仔可以靜靜咁「離地」工作,兼送埋wifi添!

受疫情影響,全球旅遊業大受打擊,各地嘅著名景點、主題樂園要被逼關閉,就算重開生意亦相當慘淡。位於日本東京市郊嘅讀賣樂園(Yomiuri Land)最近就推出「娛樂休假工作」(Amusement Workation)計劃自救。客人可以喺摩天倫上面任坐1個鐘,期間摩天輪會轉5圈,現場更設有wifi,要喺高空中開視像會議、工作完全無難度。此外,樂園又喺泳池旁提供工作用嘅檯同凳,客人仲可以租借拖板、叉電器同小型wifi等。遇著落雨天,園方會開放餐廳俾客人入內工作,非常貼心。

有日本公司嘅員工接受媒體訪問表示,喺摩天輪上同同事開會,可以向佢哋展示出面嘅風景,亦可以改變自己嘅工作心情。有網民對計劃表示歡迎:「無聊的工作也變得有趣呢」,不過亦有網民坦言喺摩天輪上無法專心工作,而且由高空望落去有啲恐怖:「快嚇死了」。據官網顯示,呢項喺摩天輪工作嘅服務需要提前預約,平日價格係每人1900円(約139港幣),假日就係每人2000円(約147港幣)。

圖:prtimes.jp