無論仔女變成點,都係父母嘅心肝寶貝。美國一位女攝影師Stephanie Mullowney喺6年前被吿知自己未出世嘅囡囡可能患有唐氏綜合症,但佢就拒絕做人工流產,堅持生咗囡囡Hannah Grace。6年之後,Hannah喺Stephanie嘅照顧下健康成長,最近Hannah幼稚園畢業, Stephanie仲親自幫囡囡影咗一輯畢業相,母愛溢出相框,感動咗唔少網民。

6年前Hannah仲未出世嗰陣,醫生就話俾Stephanie知佢嘅囡囡好可能患有唐氏綜合症,問佢會唔會選擇終止懷孕。Stephanie斷然拒絕,堅持誕下囡囡。不過Stephanie嘅丈夫就接受唔到患有唐氏綜合症嘅囡囡,Hannah出世幾日後,就離開咗佢兩母女。Stephanie自此成為單親媽媽,要獨自一人湊大囡囡。點知Hannah之後被發現心臟有3個窿,並懷疑佢有白血病。好彩,之後佢心臟嘅3個窿最後都自行癒合,而所謂嘅白血病,亦都只係細菌感染,並無大礙。

Hannah就喺充滿母愛嘅環境下成長,今年順利喺幼稚園畢業,Stephanie亦為佢感到驕傲:「她克服了所有困難,我從她身上獲得的快樂,她教會了我用不同的眼光看待世界。」

圖:IG@thedollcollections