香港唔少街道兩旁都種滿樹木,曾經有樹木倒塌造成人命傷亡,引起社會對樹木管理嘅關注。5位香港專業教育學院(IVE)生物科技高級文憑畢業生,就改良咗現時快速鑑定樹木真菌品種DNA檢測方法,得以及早預防、診斷同治療受感染嘅樹木。呢個項目早前就喺職業訓練局(VTC)主辦嘅「創意x應用」計劃中奪「卓越大奬」,認真犀利。

透過辨別出樹木受感真菌品種,就能夠對症下藥,而現時樹藝師主要係以目測方法辨識,又或者將菇菌同佢嘅孢子交由實驗室檢測。用肉眼去辦別,一來唔夠準確,二來就要等到真菌長成菇先至辨識到問題,就已經錯過治療最佳時機。

研究團隊成員之一嘅鄒俊傑表示,部分高危真菌長成菇菌時,已經對樹木結構造成一定破壞,所以研究以泥土檢驗方法取得真菌嘅脱氧核糖核酸(DNA),盡早得知樹木受邊種真菌感染。鄒俊傑解釋,團隊從泥土樣本取得真菌DNA後,再利用分子生物技術複製並檢測泥土中真菌DNA序列,再同基因資料庫中嘅真菌DNA序列作對比,分析出泥土中嘅真菌品種。

另一位成員歐家杰就表示,研發期間遇到唔少挑戰,例如泥土含有唔少化學物質阻礙分子診斷,團隊參考大量文獻,發現加入「納米金粒子」,可以提升複製DNA靈敏度十倍,有助解決假陰性問題,提升測序成功率達3成。另一成員何耀忠補充,為咗搵出加入「納米金粒子」嘅合適份量同濃度,佢哋花咗近半年時間,完成超過500次測試,先至可以確保測試準確性。

鄒俊傑現時已經升讀本地大學自然科學相關學士學位課程,佢希望日後喺植物科學研究上繼續鑽研,貢獻社會。

原圖:VTC