隨住疫情緩和,康樂及文化事務署轄下嘅博物館早前已經重開,近日更開始為期2個幾月嘅「香港博物館節2020」,舉行一系列嘅文化、歷史、藝術、電影、科學、天文及文物復修嘅線上線下節目同活動,喺限聚令之下市民仍然可以喺屋企參與部分活動。

今年博物館節以「快遞」作為主題,因應疫情,博物館喺節目設計方面不斷探索新方向同可能,將限制轉化為創新嘅動力,將更多新體驗快速送遞到市民手中。

此外,今年博物館節亦作出一個新嘗試,推出「博物館精選好書半價特賣」,挑選100本由博物館精心製作同出版嘅展覽圖錄同研究論文集,分別喺香港藝術館、香港文化博物館、香港歷史博物館同香港電影資料館半價發售,公眾亦可透過指定網購平台訂購書籍。

多位博物館館長亦會舉行4場「館長好書介紹講座系列」同公眾對話,讓市民透過閱讀,享受文化歷史等多元學習嘅樂趣。

原圖:大公報