唔少女士平時都會有化妝嘅習慣,不過化妝品入面嘅閃粉原來係會污染海洋,就算係可生物分解嘅閃粉,亦都會對食物鏈最底層嘅初級生產者造成負面影響,衝擊生物網絡,大家真係少用為妙!

外國傳媒報道,傳統閃粉係由聚對苯二甲酸乙二酯製成嘅塑膠芯組成,呢啲塑膠芯會先塗上鋁,然後再蓋上一層薄塑膠,呢啲閃粉會污染河流、湖泊,一旦流入海洋更會造成環境災難,需要好多年先至可以分解,去年一啲科學家已經呼籲全球禁用閃粉。

雖然人類一直致力尋找可生物分解嘅閃粉,取代傳統閃粉,包括一種以纖維素取代塑膠芯嘅閃粉,以及另一種由天然礦石雲母中提取嘅閃粉,但根據最新研究就發現,原來呢啲可生物分解嘅閃粉一樣會破壞環境,影響浮萍同微藻嘅生長。

安格里亞魯斯金大學生物學系高級講師丹妮爾·格林表示,呢啲影響可能係由閃光產生嘅滲濾液,或者閃粉嘅塑料塗層或其他材料引起,未來會對此進行更詳細研究。

原圖:新華社