唔同文化,都會有唔同嘅趨吉避凶方法。喺羅馬尼亞,一對兄弟喺嫲嫲故居整理遺物嘅時候,意外喺牆入面挖出1隻過百年歷史嘅貓木乃伊,拍賣行負責人表示,相信價值大約800至1200英鎊(約8060至12090港元)。

外國媒體報道,Valentin Hirsch同佢嘅兄弟Adrian早前去到佢哋嫲嫲位於羅馬尼亞外西凡尼亞(Transylvania)嘅故居整理遺物,當佢哋清理地窖嘅時候,發現地窖嘅牆身鬆動,徒手挖開牆身之後發現咗呢具貓木乃伊。

佢哋起初以為係一副小型嘅老虎雕塑藝術品,後來Valentin仔細觸摸後先發現原來係貓木乃伊。Valentin表示,非常好奇呢具貓木乃伊係點樣被放入地窖牆入面、邊個做嘅、屋以前嘅主人係邊個。佢哋兩兄弟專誠走到當地政府嘅地政部門,要求閱覽房屋土地嘅歷史資料,但仍然搵唔到重要資訊。

其後呢具貓木乃伊拎咗去拍賣,估計可以賣到800至1200英鎊。拍賣行負責人Jim Spencer就表示,喺不列顛群島、北歐同北美等地,經常都會發現有貓木乃伊藏喺建築物內,古人認為將貓嘅乾屍放喺新起嘅房屋牆內,有驅魔或吉祥嘅作用。

原圖:Twitter@nypost