大家鐘唔鐘意睇科幻片呢?有無諗過現實都可以感受到未來嘅科幻城市呢?由聽日(10月17)開始一連9日,大家嚟深水埗通州街臨時街市就可以免費感受得到。由設計香港地#ddHK主辦嘅「數碼龐克號」活動,以Cyberpunk為主題,化身成未來科幻城市,等市民可以透過展覽、周末市集、限量版設計師產品販售、講座、工作坊同導賞團等,深入發掘深水埗嘅地區特色同地道文化。

「數碼龐克號」嘅主場館位於通州街臨時街市第一至第三座,以太空飛船總部為設計概念,充滿未來科幻感,打卡一流。「數碼龐克號」將會喺10月17號至25號為公眾帶嚟一連九天嘅精彩活動,嚟顯現香港地嘅科幻魅力。現場充滿未來科幻感嘅設計同佈置,包括五光十色嘅霓虹燈背景、糖果色調嘅「女孩科幻房」、「宅男數碼房」,都彷如置身於科幻世界中。展覽仲會展出由十組本地時裝及配飾設計新星,利用喺深水埗買到嘅物料精心設計咗30組數碼龐克服飾,並會以Led Wall、魚缸、模特兒等唔同途徑展出。

參觀打卡之外,「數碼龐克號」仲有舉辦講座、工作坊、導賞團等,部分活動需要預約,詳情請瀏覽:https://www.designdistrict.hk/tc/web2019_fashion/

圖:#ddHK網頁