上到大學想讀多科,除咗雙主修(double majors)同副修(minor)之外,仲有咩選擇?香港科技大學日前宣布,即將推出一個嶄新課程架構「Major+X」,揉合傳統主修課程同新興熱門主題如人工智能(AI),為本科生提供多一個學位課程選擇之餘,亦可以融合新興知識,切合社會需要。

科大表示,大學將於下學年(2021/22學年)推出2個新課程,分別係「理學A組—延伸主修人工智能」 同「工程學—延伸主修人工智能」,入讀呢兩個課程嘅學生將於大學第二年選擇主修學科,例如物理、數學、計算機科學、土木工程或海洋科技等,同時修讀AI課程作為「延伸主修」。同學修畢4年課程之後,畢業證書上會標明佢哋嘅傳統主修同延伸主修,日後科大或會加入數據科學、金融科技或數碼媒體及藝術等等新興領域,作為延伸主修。

科大首席副校長倪明選教授表示,喺呢個數據時代,新科技同知識正以史無前例的速度不斷蛻變,科大希望將AI呢種新知識融入現有體系中,讓同學懂得點樣喺現實層面應用新興技術,佢強調就每一個新興領域推出新課程未必最為有效,亦係科大推出Major+ X嘅主要原因。

科大首席副校長資深顧問暨本科入學小組委員會主席龐鼎全教授就表示,Major+X可為同學提供更大彈性,讓佢哋喺新科技興起時把握機會,但即使某個知識領域變得過時,佢哋嘅學位仍然可以保持競爭力。

原圖:香港科技大學