生命會影響生命,人嘅一生如果可以遇到一位好老師,絕對可以改變人生。山西一位叫苗紅春嘅女子,因為被診斷患有橫貫性脊髓炎,導致下肢癱瘓,要依靠輪椅代步。佢亦因此變得自卑、唔敢出門,好彩佢遇到咗申愛萍老師,申老師令苗紅春慢慢走出陰霾,勇敢追尋自己嘅夢想,成功開輔導班圓老師夢。

今年32歲嘅苗紅春,夢想係做老師,不過佢8歲嗰年被診斷出患有橫貫性脊髓炎,從此佢出門只能依靠輪椅,完全顛覆咗苗紅春嘅生活,令佢變得唔想同人交流,唔肯出門。後嚟,喺父親嘅鼓勵下,苗紅春鼓起勇氣返學,就幸運地遇到影響佢一生嘅申愛萍老師。申愛萍好關心苗紅春,會指正佢嘅錯處,又會喺佢嘅人生規劃上俾意見。就係咁,苗紅春慢慢振作起嚟,考入山西師範大學,又喺畢業之後機緣巧合下幫朋友嘅小朋友補習英文,成功令小朋友嘅英文成績明顯好轉。後嚟越來越多學生嚟搵苗紅春補習,令苗紅春萌生開輔導班嘅諗法。

開辦輔導班期間,苗紅春仲喺殘聯公益崗工作咗3年幾,可以服務居民之餘,亦可以養活自己、改善家庭生活。截止目前,苗紅春教過嘅學生超過600人,一位苗紅春嘅學生表示,苗老師好細心,喺學習、生活上都會俾建議自己,師生間嘅關係更似朋友。苗紅春之後想喺辦好輔導班嘅同時,可以訪問更多嘅殘疾人士,希望通過自己嘅經歷鼓勵佢哋唔好放棄,加強鍛煉,走出家門,做更多想做嘅事。

圖:中新網