做飲食業開餐館絕對唔係身體健全人士嘅專利,聽障人士一樣可以經營餐館,西安有間餐館就係由聽障人士所開,老闆同店員都係聽障人士,客人去食飯落單、溝通全靠比劃、寫字,大家都安安靜靜咁用餐,所以又被叫做「無聲餐館」。老闆于繼峰表示如果餐館可以持續發展落去,仲想開多幾間嚟幫聽障人士就業。

45歲嘅于繼峰幾年前同幾位聾啞朋友開咗間餐館,啱開張嘅時候,因為大家無經驗,店員聽唔到客人講嘢,客人又睇唔明店員嘅手勢,搞到落單超慢,經營困難。後嚟慢慢改咗菜單設計,喺每張菜單印上「我是聾人服務員,請點菜」,又列明每樣餸嘅名稱、價格、口味等,客人指幾下就可以落單。如果客人有特別要求,仲可以通過手寫、手機打字嚟溝通。有熟客表示,餐館嘅服務態度好好,味道又唔錯,所以成日嚟幫襯,支持下聽障人士創業。唔少熟客更會喺食完飯後自己收拾碗筷放返取餐台,令嚟食飯嘅客人間多咗份默契。

呢間無聲餐館嘅飯餸可口、價格實惠,吸引越來越多人幫襯,經營漸趨穩定,每個員工每月都可以有3000幾蚊人工。于繼峰表示,雖然人工唔多,但就代表聽障人士同健全人士一樣可以自力更生,做飲食業固然辛苦,不過員工們都好有幹勁,成日面帶笑容。如果生意可以繼續咁好,佢仲打算開多幾間餐館,幫多啲聽障人士就業。

圖:中新網