就算身患罕見疾病、行動不便,都阻擋唔到佢哋為善嘅決心同動力!英國一個6歲小朋友Carmela Chillery-Watson,患有罕見嘅先天性肌肉萎縮症,即使腿部肌肉無力,佢始終面帶笑容,更化身「神奇女俠」用9個月時間挑戰300公里,希望為英國肌肉萎縮症患者步行籌款。Carmela嘅善舉更感動咗飾演《神奇女俠》嘅女星Gal Gadot,大讚佢先係真正嘅神奇女俠!

Carmela不幸患上罕見疾病「核纖層蛋白相關先天性肌肉萎縮症」(LMNA-related CMD),佢對腳因此過於纖瘦、肌肉無力,仲有駝背。Carmela平時出入要靠電動輪椅代步,就算可以步行亦需要用2支拐杖支撐。不過,Carmela並無因此自卑而收埋自己,反而喺父母嘅鼓勵下,決定為英國肌肉萎縮症患者步行籌款,目標係至少6000英鎊(約6萬港幣)。

300公里路對一般人嚟講或者好容易,但Carmela就足足用咗9個月先行完。佢每次挑戰都會扮成神奇女俠,著上同神奇女俠相關嘅服飾,又喺輪椅貼上《神奇女俠》嘅海報貼紙,連佢隻狗狗都有神奇女俠嘅斗篷,以此為自己加油打氣。過程中,Carmela只能慢慢支住拐杖行,唔可以行太耐太多。雖然佢嘅脊椎彎曲越來越嚴重,更出現頭暈、嘔心,但佢從嚟無埋怨過,堅持完成300公里,最後成功籌到14602英鎊(約14.6萬港幣)。Carmela嘅善舉感動咗唔少網民,連飾演《神奇女俠》嘅女星Gal Gadot都大為感動,捐出3442英鎊(約3.5萬港幣)支持。Gal Gadot喺社交平台分享Carmela嘅事跡,表示自己好榮幸可以參與到呢段路程,已經迫不及待想快啲見到Carmela,更大讚佢先係真正嘅神奇女俠。

圖:IG@gal_gadot