鳳爪同雞髀大家就見得多、食得多,不過連埋隻雞腳一齊炸嘅雞髀大家又見過未?喺美國三藩市,米芝蓮一星級餐廳Birdsong嘅主廚Chris Bleidorn同佢嘅團隊推出咗一款連埋雞腳嘅雞腿包,而背後嘅理念原來係希望食客可以反思食材嘅來源。

Birdsong喺3月嘅時候,因為疫情關係需要關門,Chris同佢團隊研發外賣炸雞,並推出咗呢款雞腿連雞腳製成嘅雞腿包。呢個雞腿包以餐盒形式出售,名為「Birdbox」,每個20美元(約155港元),盒裡面分開擺放麵包、醬料同連腳炸雞腿,客人可按照指示夾起漢堡。

Birdsong特意為呢款雞腿包開設IG帳號,強調採用嘅雞隻都係有機放養,並且係食素。美國有線新聞網絡(CNN)記者一試之後,形容呢款雞腿包外觀詭異,但好食到令人難忘。報道又指,Chris希望讓顧客認識食材來源同如何飼養肉雞,認為美國人習慣喺商店購買一整包24隻雞翼或雞鎚,諗都唔諗就成包放入購物車,就好似唔知24隻雞翼來自12隻雞咁。

Chris又批評,肉商只係諗住啲雞可以幾快養大、養到幾肥、賺幾多錢,而佢餐廳所用嘅雞都係成隻咁買,頭同腳都喺度,佢仲話雞腳連住啲肉,證明有好好地養大,而唔係迫喺籠入面成長。

原圖:IG@birdsong_sf