港協暨奧委會將會喺聽日(1016日)至1031日舉行「奧運日BINGO Challenges」,等大家認識「奧運日」之餘,仲可以喺屋企Keep Fit。咪住,可能你會問:奧運日唔係623日咩?無錯呀,不過6月本港疫情較嚴重,所以呢項活動亦被迫延期到10月先舉行。

2020奧運日BINGO Challenges9個體育總會所提供嘅挑戰項目組成。如果大家擔心留喺屋企太耐,狀態無咁好唔緊要,「SF&OC港協暨奧委會FB專頁已經布咗多條示範短片,大家可以練習一下先至進行挑戰!

其中香港射箭總會就設計咗「手定定斟水大挑戰」,考吓大家手腕夠唔夠穩,而且玩法好簡單,有兩樽水加兩個杯就可以接受挑戰啦!

香港業餘田徑總會提供嘅「蠍式跨欄挑戰」,難度就高少少,就係轉身交替跨欄賽嘅動作,睇吓30秒內可以做到幾多吓,唔知有無人可以成功挑戰港隊跨欄運動員張宏峰30秒完成18次嘅紀錄呢?

羽毛球總會就提供「家居羽球考協調」,大家可以喺屋企搵任何長形物件(例如羽毛球筒或者水樽)向上控球,只要持續控球30秒就代表挑戰成功㗎啦!

中國香港體操總會提供嘅「平衡挑戰」,當然就要考考大家嘅平衡力,只要一個波就可以玩到架啦!

想考吓自己嘅協調力,咁就要試吓香港棍網球總會提供「花式棍網挑戰」,喺屋企用任何類似鏟型嘅物件,再加一個紙波就可以玩,30秒內完成動作就代表挑戰成功。

相信大家對投球呢項運動認識未必好深,玩吓Hong Kong Netball Association「讓膠袋飛」嘅挑戰,就可以了解投球運動員係點樣距離對手3呎去防守,玩法好簡單,首先拋起膠袋做嘅氣球,然後掂一掂距離膠袋3呎嘅櫈仔,途中要保持膠袋全程喺空中,掂一吓櫈仔成功一次,睇吓你可以掂到幾多吓啦!

Hong Kong, China Rowing Association提供嘅「在家賽艇挑戰」,唔需要室內賽艇機,只要喺屋企搵條毛巾同搵個波,然後坐喺一張有轆嘅櫈上面,就可以模擬賽艇嘅動作咁傳送物件,持續30秒就完成啦!

最後就係乒乓球總會提供嘅「乒乓球滴檯邊大挑戰」,乒乓波作為一項好普及嘅運動,喺乒乓波檯上面打就太容易啦,但用檯邊打大家又有冇人試過呢?大家可以運用任何平面嘅硬物(例如手機)去接受呢項架!

有興趣嘅朋友,可以到「SF&OC港協暨奧委會FB專頁參加,凡參與活動嘅朋友有機會贏得豐富禮品你準備好接受挑戰未呢?

圖片來源:FB@ SF&OC港協暨奧委會

「手定定斟水大挑戰」


「蠍式跨欄挑戰」


「家居羽球考協調」


「平衡挑戰」

「花式棍網挑戰」


「讓膠袋飛」

「在家賽艇挑戰」


「壘球大挑戰」

「乒乓球滴檯邊大挑戰」